माङ्सेबुङ।इलामको माङ्सेबुङ गाउँपालिका–२, मा आज (आइतबार) भएको बोलेरो दुर्घटनामा तीन जनाको मृत्यु भएको छ । मे १ ज ४८७ नम्बरको बोलेरो सडकबाट करिब २ सय मिटर खसेर दुर्घटना भएको जिल्ला प्रहरी कार्यालयले जनाएको छ ।
प्रहरीका अनुसार पाँचथरको मिक्लाजुङ गाउँपालिका– ५ का ६५ वर्षे हिमप्रसाद लावती, त्यहींकी ६० वर्षीया पदमकुमार लावती र इलामको माङ्सेबुङ गाउँपालिका–६ का ५० वर्षे प्रकाश राईको मृत्यु भएको हो । पाँचथरको रविबाट झापाको दमकतर्फ यात्रु लिएर जाँदैगरेको बोलेरो भित्री सडकमा दुर्घटना भएको हो ।
हिमप्रसाद र प्रकाशको घटनास्थलमै र पदमकुमारीको उपचारका लागि अस्पताल लैजानेक्रममा बाटोमा मृत्यु भएको प्रहरीले जनाएको छ ।
गाडीमा अन्य यात्रु नरहेको प्रहरीको भनाइ छ । गाडी आफैं अनियन्त्रित भइ दुर्घटना भएको र घटनाबारे थप अनुसन्धान भइरहेको प्रहरीले जनाएको छ ।
प्रहरीका अनुसार चालक फरार छन् ।
