जिल्ला समन्वय समितिका नवनिर्वाचित पदाधिकारीलाई स्वागत तथा निवर्तमान पदाधिकारीलाई बिदाइ गरिएको छ ।
जिल्ला समन्वय समिति सभाहलमा सोमबार आयोजित समारोहमा स्वागत, बिदाइ र नवनिर्वाचित पदाधिकारीको परिचयात्मक कार्यक्रमसमेत सम्पन्न भएको हो । त्यस अवसरमा जिससका निवर्तमान प्रमुख गणेशप्रसाद बरालले नवनिर्वाचित प्रमुख जयप्रकाश राई र उपप्रमुख चित्रकला बराइलीलाई स्वागत गरे ।
नवनिर्वाचित प्रमुख राई, उपप्रमुख बराइलीसहित जिसस सदस्यहरू मीनाकुमारी राई, सीता कार्की, प्रेमराज गुरुङ, शेरबहादुर खालिङ, रामप्रसाद लिम्बू, सपनादेवी राई र तृष्णा लोहारलाई निवर्तमान प्रमुख बरालसहितका अतिथिले स्वागत गरेका थिए । त्यही अवसरमा नवनिर्वाचित प्रमुखसहितका पदाधिकारीले निवर्तमान प्रमुख बरालसहित सदस्यहरूलाई अबिर र खादा लगाइ ‘सम्झनाको चिनो’सहित बिदाइ गरे ।
कार्यक्रममा पूर्वमन्त्री तथा १ नम्बर प्रदेश सभासद रामबहादुर रानामगर, इलाम नगरपालिका प्रमुख केदार थापा, निवर्तमान प्रमुख महेश बस्नेत, माइजोगमाई गाउँपालिका अध्यक्ष कुशबहादुर थेबे, इलाम नगरपालिका उपमेयर विष्णुकुमारी लिम्बू (दाहाल) माई नगर उपप्रमुख हिमा भण्डारी, प्रमुख जिल्ला अधिकारी माधवप्रसाद ढुंगाना, जिल्ला प्रहरी प्रमुख एसपी महेन्द्रकुमार श्रेष्ठ, माइजोगमाई गाउँपालिका उपाध्यक्ष प्रविना राई, नेकपा (एमाले) उपसचिव रवीन्द्र सुवेदीलगायत सहभागी थिए ।
कार्यक्रममा विभिन्न स्थानीयका प्रमुख प्रशासकीय अधिकृत, कर्मचारी, विभिन्न राजनीतिक दल, गैरसरकारी संस्थालगायतका प्रतिनिधिसमेतको सहभागिता रहेको जिल्ला समन्वय अधिकारी हरि दाहालले जानकारी दिए ।
