कुनै कानुनी सुनुवाई नगरी ४० वर्ष भारतीय जेलमा थुनिएर शनिबार जेलमुक्त भएका छोरा दिपक तिम्सिनाको आउने बाटो हेर्दै ८५ वर्षिया आमा धनमाया घरको आँगनमा बसिरहेकी छन् । इलामको माई नपा वडा नम्बर १० लुम्बाकस्थित घरमा स्थानीइ सञ्चारकर्मी पुगेपछि उनीहरुको माझमा धनमाया प्रशन्न भएर छोराको स्वागतमा बसेकी छन् । दिपक आज आउँदैछन् ।
चालीस वर्ष भारतको कोलकातास्थित दमदम जेलमा बिना सुनुवाइ बिताएका इलामको माई नगरपालिका–१० का ६१ वर्षीय दुर्गाप्रसाद तिम्सिना काँकडभिट्टा आइपुगेका हुन्। कोलकाता उच्च अदालतका न्यायाधीशद्वय ठोटविल बी राधाकृष्णन् र अनिरुद्र रोयको आदेशमा काकाका छोरा प्रकाशचन्द्र तिम्सिनाको रोहवरमा शनिबार उनलाई दमदम कारागारले रिहा गरिदिएको थियो ।
उनी काँकडभिट्टामा आज बिहान ९ः१५ बजे आइपुगेका हुन् । कोलकाताबाट हिजो स्थलमार्ग हुँदै कार चढेर काँकडभिट्टा आउँदा विश्व सेवा विस्तार नामक उद्धार संस्था, सञ्चारकर्मी र आफन्तहरुले उनलाई फूलमाला र खादा लगाएर स्वागत गरेका थिए । काँकडभिट्टामा आजै आयोजित पत्रकार सम्मेलनमा उनले आफ्नो देश आउन पाएकामा खुशी व्यक्त गर्दै आफु निर्दोष अवस्थामा जेलमा यातनापूर्वक थुनिएको बताए। उनले आफ्नी आमालाई भेट्न आतुर भएको बताए।
