इलाम। ‘इलामेहरुको पीडामा मल्हम पट्टी’ अभियान अन्तर्गत कोभिड व्यवस्थापन तथा राहत कोष व्यवस्थापन तथा सञ्चालन समितिले आजबाट इलामका स्थानीय तहहरुलाई स्वास्थ्य सामग्री प्रदान गर्न थालेको छ ।
समितिले आज (सोमबार) माङसेबुङ गाउँपालिकालाई एक लाख ४० हजार बराबरको स्वास्थ्य सामग्री हस्तान्तरण गरेको छ । अभियानका अभियन्ता निरोज खड्कीका अनुसार बेड, अक्सिमिटर, सेनिटाइजर, ग्लोब्स, फेस शील्ड, पीपीईलगायतका स्वास्थ्य सामग्रीहरु माङसेबुङ गाउँपालिकाका अध्यक्ष डिकेन्द्र इधिङ्गोलाई हस्तान्तरण गरिएको हो ।
यसरीनै इलामका १० वटा स्थानीय तहलाई एक लाख ४० हजार बराबरको कारोना संक्रमण नियन्त्रणका लागि आवश्यक पर्ने सामग्रीहरु हस्तान्तरण गरिने अभियन्ता खड्गीले बताए । मंगलबार फाकफोकथुम र माइजोगमाई गाउँपालिका तथा सूर्योदय नगरपालिकालाई सामग्री हस्तान्तरण गरिने पनि उनले बताए ।
यसअघि इलाम अस्पताललाई छ लाख बराबरकाे सामग्री हस्तान्तरण गरिएकाे छ ।
कोभिड–१९ को दोस्रो लहरका कारण समस्यामा परेका इलामेहरुलाई देश तथा विदेशमा रहेका इलामे तथा इलामलाई माया गर्ने व्यक्ति र संस्थाहरुबाट प्राप्त सहयोगबाट सामग्री हस्तान्तरण गरिएको पनि खड्गीले बताए ।
‘इलामेहरुको पीडामा मल्हम पट्टी’ अभियान अन्तर्गत कोभिड व्यवस्थापन तथा राहत कोष व्यवस्थापन तथा सञ्चालन समितिमा उद्योग वाणिज्य संघ, नेपाल रेडक्रस सोसाइटी, नेपाल पत्रकार महासंघ, निरोज खड्गी र रतन चौधरी सदस्य रहेका छन् ।
