मोरङ । विराटनगरमा विचौलीयाको कार्य गरी सर्वसाधारणलाई दु:ख दिने दुई जना युवालाई प्रहरीले पक्राउ गरेको छ ।
पक्राउ पर्नेमा विराटनगर महानगरपालिका- ८ अमरटोलका १८ बर्षीय प्रधुम्न राय र २३ बर्षीय आनन्द कुमार साह रहेका छन् । उनीहरुले विराटनगर महानगरपालिका अन्तर्गत विभिन्न अस्पतालहरूमा उपचार गराउन आएका विरामी तथा विरामीका आफन्तहरूलाई भेटी “यहाँ डक्टर राम्रो छैन, यो अस्पतालमा कोरोना धेरै छ, उपचार राम्रो छैन” भन्ने जस्ता अफवाह फैलाई विरामी तथा आफन्तहरूलाई झुक्यानमा पारी आफ्नो सम्पर्कमा भएको अस्पताल वा क्लिनिकमा उपचारको लागि प्रेरित गर्ने गर्दै आएका थिए ।
यसरीनै सम्पर्कमा भएको फार्मेसीमा औषधि किन्न वाध्य गराउने विचौलीयाको कार्य गरी सर्वसाधारणलाई हैरानी दिने गरेको बिशेष सूचनाको आधारमा जिल्ला प्रहरी कार्यालय मोरङ र १ नम्बर प्रदेश प्रहरी कार्यालयकाे प्रहरी टोलीले भदौ ३ गते पक्राउ गरेको प्रहरीले जनाएकाे छ । पक्राउ परेका दुवैजनालाई जिल्ला प्रहरी कार्यालय मोरङबाट थप अनुसन्धान गरिरहेकाे छ ।
