इलाम । इलामका अग्रज पत्रकार सोमनाथ सुसेलीले नेपाली कांग्रेसको भदौं २७ गते हुन लागेको नगर अधिवेशनमा सभापतिमा उम्मेद्वारी घोषणा गरेका छन् । पत्रकार सुसेलीले इलाम नगरपालिकाको सभापतिमा उम्मेद्वारी घोषणा गरेका हुन् ।
नेपाली कांग्रेसको वडा अधिवेशन भदौं १८ गते सम्पन्न भएको छ । भदौं २७ मा पालिकाका अधिवेशन हुँदैछ ।
दुई दशकभन्दा अगाडिदेखि पत्रकारितामा सक्रिय सुसेली जनआन्दोलन २०६२।०६३ मा नागरिक समाजको तर्फबाट अगुवाई गरेका थिए । पत्रकार सुसेलीलले नागरिकको अभिब्यक्ति स्वतन्त्रता, मानवअधिकार र लोकतन्त्रका लागि कलम मात्र होइन आन्दोलनको समेत अगुवाई गर्दै आएका छन् ।
नेपाल पत्रकार महासंघको दुई कार्यकाल जिल्ला सभापति तथा प्रदेश नम्बर १ को उपाध्यक्ष भइसकेका सुसेलीले नगरको कांग्रेसलाई गुटरहित बनाउँदै एकढिक्का बनाउनका लागि आफ्नो उम्मेद्वारी रहेको बताएका छन् ।
‘२०५१ देखिनै नेपाली कांग्रेसमा सक्रिय छु र अहिले पत्रकार महासंघको कुनै पदमा पनि छुइनँ ।’ उनले भने, ‘यसैले मैले उम्मेद्वारी दिएको हो ।’
आफू नेतृत्वमा आएका अग्रजको सम्मान, समकालीन साथीहरुसँग सहकार्य र युवा साथीहरुलाई माया र हौसला प्रदान गर्दै पार्टी सञ्चालन गर्ने पनि उनले बताए ।
