सिलिण्डर ग्यास लिक भएर आगलागीमा परी घाइते भएका झापा अर्जुनधाराका अग्निपीडितहरुको उपचारमा आर्थिक अभाव खड्किएकाे छ । भदौ २६ गते शनिबार साँझ ग्यास लिक हुँदा आगजनी भएको थियो । आगलागीमा परी जलेर चार जना घाइते भएका थिए । रोम खनालको घरमा भएको सो आगलागीमा परी घरधनी खनाल, उनी श्रीमती दुर्गा खनाल, छोरा पंकज खनाल र आमा मंगलादेवी खनाल घाइते भएका थिए । मंगलादेवी सामान्य घाइते भएकी थिइन् भने बाँकी तीन जना गंभीर घाइते भएका थिए ।
आगलागीमा परी रोमको शरीरको ५० प्रतिशत, दुर्गाको ३० प्रतिशत र पंकजको १५ प्रतिशत भाग जलेको छ । तीनै जनाको अहिले काठमाडौँस्थित कीर्तिपुर अस्पतालमा उपचार भइरहेको छ । जसमध्ये गम्भीर घाइते भएका रोम र दुर्गाको आइसीयू कक्षमा उपचार भइरहेको छ । पंकजको जेनेरल वार्डमा उपचार भइरहेको छ । रोमको उपचारमा करिब १० लाख, दुर्गाको उपचारमा करिब ८ लाख र पंकजको उपचारमा करिब ४ लाख रुपैयाँ खर्च हुनसक्ने अस्पतालको पूर्वानुमान छ ।
आगलागीबाट खनालको घर ध्वस्त भएको छ । सामान्य अबस्थाका खनाल परिवारको आर्थिक अबस्थाले नधान्ने भएपछि सहयोगका लागि आह्वान गरिएको छ । त्यसका लागि एक सहयोग समिति गठन गरिएको आफन्त टंकप्रसाद खनालले बताए । उनले आफ्नो परिवारमा परेको समस्यालाई हल गर्न छरछिमेकी, साथीभाइ, आफन्तसहित धेरै सहयोगी मन जुटेकोमा हार्दिक आभार व्यक्त गर्दै विपत्तिमा सहयोगको लागि अपिल गरेका छन् । यसैबीच समाजसेवी तथा अभियन्ता उज्वलविक्रम थापाले औषधि उपचारका लागि ५० हजार रुपैयाँको चेक अस्पताललाई हस्तान्तरण गरेका छन् ।
आगलागीका कारण खनाल परिवारकाे घर समेत पूर्ण रुपमा जलेकाे छ । घर बनाउन भन्दा पनि शुरुमा घाइतेलाइ उपचारका लागि खर्च आवश्यक परेकाे दुर्गाका कान्छा भाइ खडानन्द ढकालले जानकारी दिए । ढकालका अनुसार विरामीकाे अवस्था नाजुक भएकाले खर्च बारेमा एकिन भइसकेकाे छैन ।
