इलाम नगरपालिकास्तरीय अन्तर माध्यमिक विद्यालय (९–१२) हाजिरीजवाफ प्रतियोगिताको उपाधि अमर माध्यमिक विद्यालय बरबोटेले जितेको छ ।
शुक्रबार इलाम सदरमुकामस्थित इलाम एजुकेशन फाउण्डेसनमा भएको हाजिरीजवाफ प्रतियोगितामा पूर्ण स्मारक माध्यमिक विद्यालय दोस्रो, आदर्श माध्यमिक विद्यालय तेस्रो र सुम्बेक माध्यमिक विद्यालय सान्तवना भएका छन् । प्रतियोगितामा जीत हासिल गर्नेमध्ये पहिलोले पाँच हजार रुपैयाँ, दोस्रो हुनेले तीन हजार रुपैयाँ, तेस्रो हुनेले दुई हजार रुपैयाँ र सान्तवनाले एक हजार पाँच सय रुपैयाँ पुरस्कार प्राप्त गरेका थिए ।
इलाम नगरपालिकाका सात संस्थागत र नौ सामुदायिक गरी १७ विद्यालयले प्रतियोगितामा भाग लिएका थिए । कार्यक्रममा समता शिक्षा निकेतनका विद्यार्थीले नृत्य प्रस्तुत गरे । नेपाल राष्ट्रिय शिक्षक संगठन इलाम नगरपालिकाले आयोजना गरेको कार्यक्रमको अध्यक्षता संगठनका नगर अध्यक्ष गोविन्दकुमार बुढाथोकी र इलाम नगरपालिकाका प्रमुख महेश बस्नेतको प्रमुख आतिथ्यमा भएको थियो । 
कार्यक्रममा प्रमुख अतिथि बस्नेत, इलाम नगरपालिका शिक्षा शाखाका प्रमुख प्रेमकुमार गौतम, नेपाल राष्ट्रिय शिक्षक संगठन इलामका अध्यक्ष प्रकाश खनाल, अखिल नेपाल राष्ट्रिय स्वतन्त्र विद्यार्थी युनियनका प्रदेश १ का संयोजक रवीन्द्र सुवेदीले शुभकामना मन्तव्य राखेको संगठनका नगर सचिव अर्जुन ढुंगानाले जानकारी दिए ।
