सुदर्शन थापाको निर्देशन तथा लगानीमा बनेको फिल्म ‘म यस्तो गीत गाउँछु २’ निर्धारित मितिमा प्रदर्शन नहुने भएको छ। पूर्व निर्धारित मिति माघ १९ गते फिल्म प्रदर्शन नहुने निर्देशन थापाले एक विज्ञप्ति जारी गर्दै जानकारी दिएका हुन्।
‘कोरोना भाइरसबाट बच्नका लागि नेपाल सरकारले आवश्यक कामबाहेक भिडभाडमा नजान र धेरै मानिसको भेला हुने कार्यक्रम नगर्नका लागि सूचना जारी गरेको छ,’ विज्ञप्तिमा भनिएको छ, ‘जसकारण माघ १९ मा प्रदर्शन हुन लागेको चलचित्र ‘म यस्तो गीत गाउँछु २’ सरकारको कदममा कदम मिलाउँदै अर्को सूचना नआउँदासम्म प्रदर्शन नगर्ने निर्णय गर्दछौं।’
सांगीतिक प्रेम कथामा आधारित फिल्म यो दोस्रो पटक प्रदर्शनबाट सरेको हो। यसअघि २०७६ फागुन ३० मा पनि कोरोना महामारीका कारण फिल्मको प्रदर्शन मिति सरेको थियो। अहिले पनि फिल्म अनिश्चित कालका लागि सरेको छ। निर्माण पक्षका अनुसार कोभिडको तेस्रो लहर सहज भएपछि चलचित्रको नयाँ प्रदर्शन मिति सार्वजनिक हुनेछ। पूजा शर्मा, पल शाह, हरिहर शर्मा, दिनेश डिसीलगायत कलाकार रहेको फिल्ममा अभिनेत्री शर्माको पनि लगानी छ।
