वैदेशिक रोजगार बोर्डको गएको पाँच वर्षको तथ्याङ्कलाई हेर्दा इलामबाट वैदेशिक रोजगारीमा गएका ५८ जनाको ज्यान गएको छ । जसमा तीन जना महिला छन् भने बाँकी ५५ जना पुरुष छन् । बोर्डको तथ्यांकअनुसार आर्थिक वर्ष २०७४/०७५ मा १९ जनाको ज्यान गएको थियो भने आर्थिक वर्ष २०७५/०७६ मा ११ जनाले अकालमा ज्यान गुमाएका थिए ।
यस्तै, आर्थिक वर्ष २०७६/०७७ मा ९ जनाको मृत्यु हुँदा आर्थिक वर्ष २०७७/०७८ मा ११ जनाको मृत्यु भएको तथ्यांकमा उल्लेख छ । यस्तै, चालू आर्थिक वर्ष (२०७८/०७९) को पुस मसान्तसम्म ८ जना गरी पाँच वर्षको अवधिमा ५८ जना इलामे नागरिकको वैदेशिक रोजगारीको सिलसिलामा विभिन्न देश पुगेका इलामेको मृत्यु भएको छ ।
परदेशको हावापानी, खानपिनलगायतका कारणले धेरै नेपालीको सुतेको अवस्थामा नै मृत्यु भएको समाचारहरु आइरहेका छन् । त्यस्तै, सवारी दुर्घटनालगायतका कारणले पनि नेपालीले ज्यान गुमाइरहेका छन् ।
