इलामको माईजोगमाई गाउँपालिका–५ सोयाङका २२ वर्षीय पुजन बस्नेत ८ दिन देखि सम्पर्कविहीन भएको छन्। विदेश जाने तयारीमा रहेका उनी भारतबाट सम्पर्कविहीन भएको परिवारले जानकारी दिएको छ।
पारिवारिक स्रोतका अनुसार विराट ओभरसिजमार्फत क्रोएसिया जाने तयारीमा रहेका पुजन एक महिना पहिला काठमाडौं गएका थिए। क्रोएसियाका लागि भारतको पहाडगञ्ज भन्ने ठाउँमा यातायात छाप लगाउन भन्दै बस्नेतसहित केही युवा एजेन्टमार्फत भारत गएका थिए।
विदेश लैजाने एजेन्ट एकराज सेर्माका सहयोगी कल्याण राईसँगै माघ ५ गते भारत गएका उनी भारतबाट नै सम्पर्कविहीन भएको बताइएको छ। भारतको गुलाफ होटलमा बसेको जानकारी भए पनि त्यहीँबाट सम्पर्कविहीन भएको उनका भाइ पुकार बस्नेतले जानकारी दिए।
पुकारका अनुसार बास बस्नका लागि होटल बुक गरेर पुजनलाई होटलमै छाडेर सँगै गएका पोखराका आशिष रानाभाटसहितको टिम फर्किएर आउँदा बस्नेत होटलमा नरहेको बताइएको छ। त्यहीँबाट बस्नेत सम्पर्कविहीन भएको आशिषले बताएको परिवारका सदस्यले बताएका छन्।
पुजनसँग रानाभाटसहित मोरङका मनप्रसाद योङहाङ, मनबहादुर योङहाङ र कल्याण राईसमेत रहेका थिए। पुजन बेपत्ता भएपछि उनका परिवारले घटनाका बारेमा थप बुझिदिन र सम्पर्कविहीन व्यक्तिको खोजी गरिदिन सम्बन्धित सबैमा आग्रहसमेत गरेको छ।
पुजन होटलबाट एक्लै घुम्न जाँदा पुनः होटल नचिनेर सम्पर्कविहीन भएको वा अन्य केही भएको भन्नेबारे अन्योल छ। बस्नेत परिवारले म्यानपावरसँग समेत खोजी गरिदिन आग्रह गरेको छ।
