इलाम । नेकपा एमालेबाट नेकपा एसमा प्रवेश गरेका झलनाथ खनालको निर्वाचन क्षेत्रमा आयोजना गरिएको वृहत आमसभालाई नेकपा एमालेका अध्यक्ष केपी शर्मा ओलीले आइतबार सम्बोधन गर्ने भएका छन् ।
१० हजारभन्दा बढी कार्यकर्ताहरुलाई अध्यक्ष ओलीले सम्बोधन गर्ने छन् । सम्बोधनसँगै एमालेमा प्रवेश गर्नेहरुलाई स्वागत समेत गर्ने छन् । फिक्कल बजारमा आयोजना गरिने आमसभालाई एमालेका उपाध्यक्ष एवं इलाम क्षेत्र नं. २ का प्रतिनिधि सभाका सदस्य सुवास नेम्बाङले पनि सम्बोधन गर्ने एमालले जनाएको छ ।
नेकपा एमालेका प्रचार विभागले आमसभाको जानकारी दिन शुक्रबार सूर्योदय नगरपालिकामा पत्रकार सम्मेलन गरेको छ । पत्रकार सम्मेलनमा एमाले इलामका अध्यक्ष महेश बस्नेतले आमसभा विकासको दृष्टिकोणले समेत महत्वपूर्ण हुने बताए । पत्रकारहरुसँग कुरा गर्दैै नेकपा एमाले सूर्योदय नगरपालिकाकी अध्यक्ष दुर्गादेबी भट्टराईले कार्यक्रमको भब्य तयारी भइरहेको बताइन् । उनले कार्यक्रमलाई भब्य बनाउनका लागि विभिन्न ९ वटा समितिहरु सक्रिय रहेको पनि बताइन् ।
